പണ്ട് ഒരു പാവപ്പെട്ട ബ്രാഹ്മണൻ ലക്കിടി കിള്ളി ക്കുറിശ്ശിമംഗലം ക്ഷേത്രത്തിൽ എത്തി. അദ്ദേഹത്തിന്റെ കൈയ്യിൽ ഒരു പണക്കിഴിയും മുണ്ടായിരുന്നു. മൂന്നുനാലു പെൺ മക്കളുടെ പിതാവായിരുന്നു ആ ബ്രാഹ്മണൻ . തന്റെ കുട്ടികളെ വിവാഹം കഴിച്ചു കൊടുക്കുവാൻ വേണ്ടി പല സ്ഥലങ്ങളിലും സഞ്ചരിച്ച് പണം ശേഖരിച്ച് വരികയായിരുന്നു. തന്റെ കൈയ്യിലുള്ള പണക്കിഴി കുളക്കടവിൽ വെച്ച ബ്രാഹ്മണൻ കുളിക്കാനിറങ്ങി. കുളി കഴിഞ്ഞ് ആ ബ്രാഹ്മണൻ കരയ്ക്കു കയറിയപ്പോൾ അദ്ദേഹം ഞെട്ടിപ്പോയി. തന്റെ പണക്കിഴി കാണാതെ വളരെയധികം വിഷമിച്ച ബ്രാഹ്മണൻ ആ ക്ഷേത്രത്തിന്റെ ആൽത്തറയിൽ ചെന്ന് ഇരിപ്പായി.. ഈ സമയത്ത് ക്ഷേത്രത്തിലെ കഴകപ്രവർത്തി ചെയ്തിരുന്ന ഒരു " നങ്ങ്യാർ " ഉണ്ടായിരുന്നു. ഈ " നങ്ങ്യാർ ചാണകം വാരാൻ വേണ്ടി കുളക്കരയിൽ എത്തി. വാരിയെടുത്ത ചാണകത്തിൽ ഒരു പണക്കിഴി കണ്ട നങ്ങ്യാർ ഞെട്ടിപ്പോയി. ഒരു നിമിഷം ആലോചിച്ച് പാവം ആ ബ്രാഹ്മണൻ പണക്കിഴി കുളക്കരയിൽ വെച്ച് കുളിക്കാനിറങ്ങിയപ്പോൾ അവിടെ മേഞ്ഞു നടന്നിരുന്ന ഒരു പശു ഇതിന്റെ മേലെ ചാണകമിട്ടു. ഈ പണക്കിഴി നങ്ങ്യാർ സൂക്ഷിച്ചു വെക്കുകയും ചെയ്തു. കുറച്ചു ദിവസത്തിനു ശേഷം ആ ബ്രാഹ്മണൻ വീണ്ടും ക്ഷേത്രത്തിലെത്തി. നങ്ങ്യാർ ബ്രാഹ്മണനെ കണ്ടപ്പോൾ സന്തോഷത്തോടെ അടുതെത്തി കാര്യങ്ങൾ ബോധ്യപ്പെടുത്തി. ബ്രാഹ്മണൻ വളരെ സന്തോഷത്തോടെ ആ പണക്കിഴി വാങ്ങി. നല്ല മനസ്സുള്ള നിനക്ക് അതി ബുദ്ധിമാനായ ഒരു പുത്രൻ ജനിക്കട്ടെ എന്ന വരവും കൊടുത്തു. അങ്ങിനെ ആ നങ്ങ്യാർക്കുണ്ടായ പുത്രനാണത്രേ മഹാകവി " കുഞ്ചൻ നമ്പ്യാർ " എന്നു പറയുന്നു. ഐതിഹ്യങ്ങളല്ലാതെ കുഞ്ചൻ നമ്പ്യാരുടെ ജനന മരണത്തെപ്പറ്റി വ്യക്തമായ രേഖകൾ കണ്ടു കിട്ടിയിട്ടില്ല...