കപ്പേരുകാവിലമ്മയ്ക്ക് ഭക്തിഗാനമൊരുക്കി മഞ്ജുള ഹർഷകുമാറും സുഹൃത്തുക്കളും..
പെരുമ്പാവൂർ: ഭക്തിനിർവൃതിദായകമായ ഒരുപിടി നല്ല ഗാനങ്ങൾക്ക് വരികളെഴുതി ശ്രദ്ധേയയായ, ഇടവൂർ കളപ്പുരയ്ക്കൽ മഞ്ജുള ഹർഷകുമാറിന്റെ ഏറ്റവും പുതിയ ഗാനത്തിന്റെ സി.ഡി. പ്രകാശനം തിങ്കളാഴ്ച വൈകിട്ട് കാലടിയ്ക്കടുത്ത് ഓണമ്പിള്ളി കപ്പേരുകാവ് ഭഗവതിക്ഷേത്രത്തിൽ നടന്നു. കാവിലെ താലപ്പൊലി മഹോത്സവത്തോടനുബന്ധിച്ച് ക്ഷേത്രം ട്രസ്റ്റ് മുൻകൈയെടുത്ത് പുറത്തിറക്കിയ ഗാനത്തിന്റെ സംഗീതസംവിധാനം നിർവ്വഹിച്ചിരിക്കുന്നത് മഞ്ജുയുടെ സുഹൃത്തും ഗായകനുമായ വിനോദ് അനന്തൻ ആണ്. ഇടവൂരിലെ നവോദയ വായനശാലയിൽ ലൈബ്രേറിയനായി ജോലിനോക്കുന്ന മഞ്ജുളയെഴുതിയ പല ഗാനങ്ങളുടെയും ദൃശ്യാവിഷ്കാരം യു-ട്യൂബിൽ ആസ്വാദകശ്രദ്ധ നേടിയവയാണ്. കെ. എസ്. മാളവിക, ശ്രീലക്ഷ്മി സന്തോഷ്, രാഖി ബാബു എന്നിവർ ചേർന്നാണ് പുതിയ ആൽബത്തിനുവേണ്ടി പാടിയിരിക്കുന്നത്. കാലടി സാസ മീഡിയ ഹബ്ബിലെ ആഷ്ലിനാണ് ഓർക്കെസ്ട്രയും റെക്കോർഡിംഗും നിർവ്വഹിച്ചിരിക്കുന്നു. ക്ഷേത്രത്തിൽ നടന്ന ചടങ്ങിൽ, പ്രമുഖ വ്യവസായിയും കേരള മെറ്റൽ പ്രൊഡക്റ്റ്സ് ഇൻഡസ്ട്രീസ് ലിമിറ്റഡിന്റെ ചെയർമാനുമായ മോഹനൻ കുഴയൻവേലി ഗാനം റിലീസ് ചെയ്തു. ക്ഷേത്രം ട്രസ്റ്റ് പ്രസിഡന്റ് ബാബു എൻ. വെളിയത്ത്, വൈസ് പ്രസിഡന്റ് ടി.എ. അശോകൻ തേനൂരാൻ, സെക്രട്ടറി കെ.എസ്. സന്ദീപ്, ട്രഷറർ കെ.എൻ. വിദ്യാധരൻ, ബിജു പി.എൻ., കെ.എൻ. സത്യൻ തുടങ്ങിയവർ ചടങ്ങിൽ സംബന്ധിച്ചു. കലാകാരന്മാരെ ചടങ്ങിൽ മെമെന്റോ നൽകി ആദരിക്കുകയും ചെയ്തു. ഗാനം അടുത്തയാഴ്ച യു-ട്യൂബിൽ പ്രദർശനത്തിനെത്തുമെന്ന് മഞ്ജുള ഹർഷകുമാർ പറഞ്ഞു.